IKIU Qaanaami
Piareersarfik utoqqaallu illuat sisamanngornermi ullumi pulaarneqarput, ilinniakkamullu qinnuteqartut utoqqaallu sutigut IKIU-miit ikiorneqarsinnaanersut oqaluttuarineqarput.
Nunatsinni IKIU-p angalaartarnerani aappariinnermut, soraarsitaanernut, attartukkanit anisitaanermut taarsiiffigitinnermullu tunngassuteqartut apeqqutigineqarajuttarput.
Siorpalummut tikeraarnissaq taamaatinneqangajappoq sikuerussimanera pissutigalugu.
Taamaakkaluartoq IKIU-mi sulisut qimussertartumik attartorput arfininngorpallu Siorapaluup tungaanut sikup sinaanut qimussiunneqassapput, tassanngaaniillu angallammik Siorapalummut apuunneqassallutik allaffimmi pisortaq Sofia Rossen KNR-imut oqarpoq.
Siorapalummi innuttaasut arfininngorpat nalunaaqutaq ullup qeqqaniit marluk tungaanut IKIU-mit ikiorneqarsinnaapput, tamannalu kommunip allaffiani pissaaq.
Qaanaami innutaasut ataasinngorpat marlunngorpallu IKIU-mit sulisunik oqaloqateqarsinnaapput tamannalu pissaaq Qaanami Qaasuitsup eqqartuussiviani.
IKIU-mit ikiorserniarneqaraanni inoqutigiit kisimiittut ukiumut amerlanerpaamik 300.000 koruuninik isertitaqassapput aappariillu amerlanerpaamik 375.000 koruunit isertitaqarsimassallutik.
Taamaakkaluartoq IKIU innutaasunut siunnersuinissamut imaluunniit suliani aalajangersimasuni allanut innersuussilluni ikiunissaminut piareersimajuaannartoq, IKIU tusagassiuutinut nalunaaruteqarluni taama allappoq.
