Ikiu: Kommunit innuttaasut sanngiinnerit sumiginnaraat

Isumaginninnermi sullissisut kommunineersut, amigartumik siunnersuinerisa kinguneranik innuttaasut eqqortumik ikiorneqanngitsoortartut, Sofia Rossenip tikkuarpaa.

- IKIU-mut saaffiginnittartut ataasiinnaanngillat, arlaqartarput. Angajoqqaat meeqqaminnik arsaarneqartartut tassaapput kommunimit oqarfigineqartartut meeqqatit tigoqqissinnaanngilasi, uffa uagut isumaqarpugut, kommunip siumoorluni isumagereertussaagaat qanoq meeqqat angerlartinneqarnissaat suliniutissat qanoq ittuusinnaaneri.

IKIU-p allaffeqarfiata pisortaa, Sofia Rossen KNR-imut oqarpoq.

Innuttaasut ikiortariallit IKIU-mut saaffiginnittartut ukiuni kingullerni amerliartortut aamma IKIU-p sulisuisa maluginiarpaat. Taamaammat inunnik isumaginninnermi sullissisut ilinniarteqqinneqartariaqartut, Sofia Rossenip siunnersuutigaa.

-Kommunini sagsbehandlerit taakkua iluamik ilinniartilluarnissaat maleruagassanut tunngasunik, imaakkami ilaannikkut paasissutissat pisartakkagut, aalajangiineq imaappoq taava tassa soqqinneqarsinnaanngilaq, uffa aalajangiinerit tamatigut arlaatigut ingerlateqqinneqarsinnaasut, Sofia Rossen oqarpoq.

Innuttaasunik sullissisut kukkuluttorpallaartut

Eqqartuussissuserisup IKIU-milu siulittaasuusup, Anders Meilvangip, inuit pisinnaatitaaffii pillugit marlunngormat siuliani tusarniaanermi oqaatigaa, suliassamik isumaginnittut kukkuluttorpallaartut aamma malugisimallugu.   

-Maluginiagaraarput, kommunini inunnik isumaginninermi ingerlatsivimmi, suliassamik isumaginninnermi amerlasuunik kukkusoqartartoq. Inuit saaffiginnittut pisinnaatitaafimminnik naammattumik ilisimatinneqarneq ajortut ilimagaarput, innuttaasullu piginniaattaaffitik naapertorlugit sullinneqanngitsoortartut. Inuit saaffiginnikkaangata tamakkuninnga tusartarpugut, Anders Meilvang oqarpoq.

Taanna inunnik isumaginnittoqarfinni suliassamik isumaginnittut kukkuluttornerinik aaqqiissutissamik siunnersuuteqarpoq.

-Suliassamik isumaginnittut ataasiakkaat ilinniartinneqarnerussariaqarput suliassamik isumaginnittullu amerlanerit sulilersinneqartariaqarlutik, IKIU-p siulittaasua, Anders Meilvang, KNR-mut oqarpoq.

KANUKOKA-imi pisortap Hans Peder Barlach Christensen-ip Sofia Rossen aamma Anders Meilvang isumaqatigai, sullissisut ataavartumik pikkorissarneqartuaannassasut. Ilinniatsitsitseqqiinermik suliami KANUKOKA-p Namminersorlutik Oqartussat peqatigigaa, taanna oqarpoq.

Kommuninit oqaaseqartitsiniaraluaratta maannamut suli iluatsinngilarput.