Ikiorsiissutissatut siunnersuut akuersissutigaat
Amerikami aningaaseriviit aningaasaliisartullu ajornartorsiorneranni aningaasanut ikiorsiissutissatut siunnersuut USA-mi Inatsisartut unnuaq kingusissukkut akuersissutigaat, 74-it akuersipput 25-t akerliusut.
Allattoq Louise M. Kleemann
oktobarip 02-at 2008 08:55
Aningaasat pineqartut 700 milliardi dollariupput – tassa 3.600 milliardi koruunit.
Siunnersuut siulleq, USA-mi naalakkersuisunit suliarineqartoq, innuttaasut sinnerlugit sinniisoqarfimmit ataasinngormat itigartinneqarpoq.
Siunnersuut, akerliusut isumaat eqqorniarlugit, inatsisartut taamanili allanngortiterlugu ulapputigaat. Siunnersuummut soorlu maanna ilaavoq suliffeqarfiit inoqutigiillu 100 milliardi koruuninik akileraarutitigut oqilisaanneqarnissaat.
Siunnersuut innuttaasut sinnerlugit sinniisoqarfiup ullumi aqaguluunniit taasissutigeqqissagaa ilimagineqarpoq. Juutit ukiortaarsiornerat pissutigalugu sinniisoqarfimmi ilaasortat ataasinngormalli ataatsimiissimanngillat.
