Ikiorsiissutissat apuunneqarsinnaanissaat pillugu ullormut sakkuaakkunaarallartoqartassasoq

Gazamut ikiorsiissutissat illoqarfimmut Rafahmut apuunneqarsinnaanissaat pillugu Israelip illersornissaqarfiata sakkuaannerit ullaakkut nalunaaqutaq arfineq-pingasuniit unnukkut nalunaaqutaq arfineq-marluk tungaannut unitsikkallartalerniarpai.

Ikiorsiissutissat Palæstinamiut pigisaanni taamaalinerani agguaanneqarsinnaalissapput.

Israelip illersornissaqarfiata tamanna nalunaaruteqartarfikkut Telegramikkut ullaaq nalunaarutigaa.

- Gazamut ikiorsiissutissat amerlanerusut anngussinnaanissaat pillugu tamaani sakkuaannerit ullut tamaasa ullaakkut arfineq-pingasuniit unnukkut nalunaaqutaq arfineq-marluk tungaannut unitsikkallarneqartassapput, Israelip illersornissaqarfia oqarpoq.

Ikiorsiissutissat Israelimit Gazamut killeqarfiup nalaani Kerem Shalomip aqqusernata nalaanit Salah al-Dinip nalaanukaanneqartassapput, taassanngaanniillu illoqarfimmi Khan Younisimi Det Europæiske Hospitalimut anngunneqartalissallutik.

Ullormut piffissami aalajangersimasumi sakkuaakkunnaarallartoqalernissaata sivisussissaa Israelip illersornissaqarfianit avammut nalunaarutigineqanngilaq, piffissaligaanngitsumilli atuutissalluni.

Ikiorsiissutissat Gazamut anngussinnaasut killeqarnerat pillugu Israel nunanit tamalaanit isornartorsiorneqarsimavoq.

Gazap Egyptenillu akornanni killeqarfikkoorfik ataaseq minillugu Israelip Gazamut killeqarfik tamakkerlugu nakkutigisaraa.

Israelip nammineq oqarnera naapertorlugu ikiorsiissutissanik naammattunik Gazamut pilersuisarpoq, tamaanimi kaannersuaqalersimanera ikiuiniaqatigiiffiit arlallit nalunaarutiginikuuaat.

Naalagaaffiit Peqatigiit peqqissuunissaq pillugu suleqatigiiffiata WHO-p oqarnera naapertorlugu Gazami meeqqat 8000-nit amerlanerusut suli tallimaliisimanngitsut naammattunik inuussutissaqarsimanngitsutut nakorsanit ikiorneqartariaqarsimapput.

Franskit nutaarsiassaqartitsiviat AFP taama allaaserisaqarpoq.