Ikiorsiissusiinermik misissuineq: Ingammik takornarialerisut ikiortariaqartut

Sulisitsisut nutaamik misissuinerminni paasisatik saqqummiuteqqammerpaat.

Nunatsinni suliffeqarfiit Sulisitsisuni ilaasortat Naalakkersuisut ikiorsiissutaat pillugit misissuinermi isumasiorneqarput.

Sulisitsisuni ilaasortat 321-upput, taakkunanngalu 146-t apeqqutinik akiortorput.

Ikiorsiissuteqarnerat ataatsimut isigalugu naammagisimaarneqartoq, misissuinermi paasisani erserpoq. Nunatsinnili inuussutissarsiortut ilaat immikkut ikiortariaqarput.

Sulisitsisut misissuinermi paasisat aallaavigalugit tunngavilersuutigisaat sisamaapput.

Takornarialerisut nunatsinnillu ammaaqqinneq

Nunatsinni takornarialerisut ikiortariaqaqisut, misissuinermi siullertut erserpoq:

- Inuussutissarsiortut ataasiakkaat pisariaqartitaat assigiinngisitaarput. Ingammilli akunnittarfiutillit, neriniartarfiutillit takornarialerisullu aningaasivimmikkut eqqugaaqalutillu ikiortariaqarput.

Nunatsinni niuertarfiit aningaasaqarnikkut ikiorniarlugit pisiniarfigineqartarnissaanik nittarsaassinissaq pisariaqartoq, ilaasortat ilaasa aappaattut erseqqissarpaat.

- Nunatsinni niuertarfinni, soorlu nunatsinni nittartakkakkut niuffaffimmi, pisiniarnerup pitsaaqutaanik aammalu nunatta takornariaqarfissuuneranik nittarsaassisoqarnerusariaqartoq, ilaasortat tamarluinnangajammik oqaatigaat.

Sulisitsisut suliniut "Nunatsinni niuffaffik" 2016-imi pilersitaraat.

Taanna nittartakkakkut attaveqatigiittarfiuvoq, nunatsinnilu suliffeqarfiutillit niuertarfiutillilluunniit niueqatigiinnerunissartik nioqqutissiornerunissartillu anguniarlugit tassani attaveqatigiittarput.

Kommunit namminersortulluunniit suliffeqarfiutaat tassani suliariumannittussarsiuussisinnaapput. Taassuminngalu atuisut tamanna takoreerunikku suliarinnittuunissamik neqeroorsinnaapput.

Ikiorsiissutinik qinnuteqarnermut piffissaliussap juunip ulluisa 30-ata tungaanut atuuttup sivitsornissaa, nunatsinni inuussutissarsiortut pingajussaattut kissaatigaat.

Kingusinaartiganilu politikkikkut pilertornerusumik iliuuseqartoqassasoq, amerlasuut kissaatigaat.

- Nunatta avammut pilertornerusumik ammaqqinneqarnissaa kissaatigaat, arlalitsigulli politikkikkut pilertortumik iliuuseqarsimaneq aamma nersorpaat. Oqartussat - aamma ersarinnerusumik - paasissutissiinerusalernissaat kissaatigaat, ilaatigullu soorlu akunnittarfiutillit takornarialerisullu eqqugaaqisut eqqarsaatigalugit nunatta ammaqqinnissaanut ersarinnerusumik periusissiornissaq aamma kissaatigaat.

Naalakkersuisut nunatta ammaqqinnissaanut periusissiaq Inatsisartunut maajip ulluisa 19-ianni saqqummiutissagaat, Naalakkersuisut siulittaasuat, Kim Kielsen, tusagassiortunik sisamanngornermi katersortitsinermi oqarpoq. Inatsisartut nunarput qaqugu ammaqqinnissanersoq oqallisigissavaat.