Ikinngutigiit marathonimut ajugaapput
Aasianni unnuarornerani marathonerluni ukiut 18-nissaat ippassaq appartoqarpoq.
Meeqqat inersimasullu 212-it isorartussutsinut assigiinngitsunut sisamanut arpannermi peqataapput.
Marathonerlutik arpattut ippassaq unnukkut qulingiluanut aallartipput, 42 kilometerinut arpannermi arnat arfinillit angutillu arfineq pingasut peqataallutik.
Isorartussutsimut annermut ajugaasuupput, siorna aamma ajugaasut Mette Lynge, Nuummeersoq aamma Frederik Petersen, Ilulissaneersoq.
Frederik Petersen apuunnermini anertikkaqaaq, piffissarlu siorna atukkani minutsinik 12-nik affarmillu qaangerlugu piffissaq atorsimasaa tassaalerpoq 2:52:02.
- Angusara naammagisimaaqaara. Aqqutaa qiteqqullugulu naarluleraluarpunga maannali ajornanga
Mette Lynge arpannermini nalunaaquttap akunneri pingasut minutsillu 45-t atorsimavai, siorna arpannerminit minutsit aappaata qeqqanik sukkaannerulluni.
- Ajunngeqaanga. Qaarsilavallaarlunga aallarama aallartinnerlulaarpunga. Kisianni kingumut ajugaaqqilluni misigisaq nuanneqaaq, Mette Lynge apuuteqqammerluni eqqissisimaqisoq oqaluttuarpoq.
Ajugaasut tamarmik pilluaqqusiortortunit ilassiorneqaqaat, unnuaagaluartormi suli isiginnaariartoqaalussimavoq - nalunaaqutaq ataasinngortoq seqinerlu kaaviinnartoq nuissat tunuannut toqqorsimalluni sila nillataakujuttoq.
Aasiaat Midnight Sun Marathonernermi ajuugaasut arnat angutillu tamarmik 5.000 koruuninik akissarsipput. Normu 2-nngortut 3.000 koruuninnapput normu 3-nngortullu 2000 koruuninnallutik.