Ikinngutigiit 50-liivoq
Tassami inuppaaluit sulerusussuseqarluartut, Kalaallit Nunaannullu atuumassuteqartut, Aalborgimi peqatigiiffiliorniarlutik ataatsimeersuarniarlutik 1964-imi februaarip ulluisa 14-ianni isumaqatigiipput.
Peqatigiiffinngortup taassuma, taamani maannalumi, siunertaa tassaavoq, kalaallit, allallu soqutiginnittut, kalaallisut oqaatsitta ataavartinneqarnissaat eqqarsaatigineqartariaqartoq, Kalaallit Nunaannullu ilisimasaqarnerup attaveqarnerullu annertusarnissaat anguniartariaqartoq, tamakkulumi peqatigiiffiup malittarisassaani allaqqalerput.
IKINNGUTIGIIT aaqqissuinerni assigiinngitsuni akuttunngitsumik katersuuttarput nereqatigiittarlutillu, namminneq aamma erinarsoqatigeeqarput, peqatigiiffittulli qanganisaatigisunik.
Kalaallit Danmarkimi erinarsoqatigiit unammiuaarnerini taakku nuannarineqarnerpaanut ilaasarput, Nunatsinni tusarnaartitsisaqattaarlutik angalasimallutik, aamma Københavnimi Tivolimi kalaallit aaqqissuinerinut peqataasarlutik, peqatigiiffiup ukiorpassuarni siulittaasua Rimdal Thårup Høegh taama oqaluttuarpoq.
Aamma peqatigiiffiup 50-inngortorsiorneranut atatillugu ullumi Aalborgimi ilasseqatigiinnermut atatillugu erinarsoqatigiit qularnanngitsumik appittussaassapput. Ilasseqatigiinneq ullaap tungaani nalunaaqutaq aqqanermiit ataatsip tungaanut pisussaavoq.