VIDEO Ikiaroorunnaarniaritsi
- Soqutiginaga pisarpusi ikiaroorlusi, ikiaruujutigalusi imiinnartusi, 15-inik ukiulik Philip Knudsen rapperpoq.
Taama saqqummernermigut angajoqqaaminut tusaaqqulluni kissaateqarpoq.
- Ikiaroortarunnaassasut neriuutigaara. Nuannarinnginnakku kisimiittarlunga, immikkoortinneqartarlunga ikiaroornartullu saninniiginnaavittut. Nuannaarsinnaananga, Philip Knudsen oqarpoq.
Taanna NUIF-imi, tassa Nuummi inuusuttut siuarsartuni, rapperluni saqqummeqqaarmat taalliai sakkortuutut piviusumillu aallaaveqartutut sulisup Kim A. Lyberthip nalilerlugit immiukkusussimavai.
- Kisimiissimanaviannginnami taamatut misigisaqarnikuusuni.
- Ullutsinni eqqartorneqanngippallaartutut taakkua oqaatigineqarsinnaapput, soorlu angajoqqaarpassuit taamaattut nalunngilagut, Kim. A. Lyberth oqarpoq.
Philip Knudsenip saqqummersitaa siulliuvoq, pilersaarutaavorlu CD-mik saqqummersitsisoqassasoq.
Philippip apersorneqarnera Qanoruumi aallakaatinneqarpoq, uanilu takoqqissinnaavat: