Ikiaroornartup inerteqqutaajunnaarnissaa kissaatigineqarpoq

Ikiaroortartoq hashi inerteqqutaajunnaarsillugu misileraanissaq pillugu inatsisinik atortitsinermut ministereqarfimmut apeqqutilliinissaq Københavnip kommuniani qinikkat amerlanerussuteqartut isumaqatigiissutigaat.

Misileraanerup aallartinneqarnissaa siunertaralugu ministereqarfimmut qinnuteqarnissaq taasissutigineqarmat Københavnimi illoqarfiup aqutsisuini 41-t isumaqataasut marluk akerliupput. Borgmesterertaaq, Frank Jensen, Socialdemokratiusoq, misileraanissamik akuersaartuuvoq, isumaginninnerlu pillugu borgmesterimit, Mikkel Warmingimit, Enhedslistimeersumit, taperserneqarpoq.

Inatsisinik unioqqutitsilluni hasheerniartarnerup akiorniarneqarnerani aqqutit nutaat atorniarneqalernerat taassuma nuannaarutigaa.

- Sapiitsuliorneruvoq. Naalakkersuisut maanna apeqqutaaginnalerput, taakkuli isumalluarnarpallaanngillat. Venstremeersulli nuimasut marluk siunnersuummut akuerseqataanerat maluginiarpara, taava taakkua Lars Løkke ikinngutitillu Christiansborgimiittut akuersitinniarumaaraat neriuutigaara, Mikkel Warming oqarpoq.

Haship inerteqqutaajunnaarnissaa Folketingimi amerlanerussuteqartut ukiarmi itigartitsissutigaat, Frank Jensenilumi parteeqamminit Christiansborgimiittunit illerneqanngilaq.

- Haship inerteqqutaajunnaarnissaa tapersersunngilarput. Haship misileraatigineqarnissaanik atornerluineq pillugu siunnersortit inerterinerat isumaqatigaarput, Socialdemokratit inatsiseqarneq pillugu oqaaseqartartuat, Karen Hækkerup oqarpoq.