- Angutit marluk ikiaroornartumik hashimik annertuumik eqqusseriaraluartut tigummigallarneqartut oqaatigisinnaavara, Politemestereqarfimmi unnerluussissuserisoq Henrik Pass KNR-imut oqarpoq.
KNR-imi paasisat naapertorlugit ikiaroornartoq hash 15 kilut missaannittoq eqqunniarneqaraluarpoq.
Angutit marluk eqqartuussivimmi inatsit tunngaviusoq naapertorlugu matoqqasumik pingasunngormat killisiorneqarput, tamatumalu kingunerisaanik sapaatip akunneri sisamat tigummigallarneqarput.
- Angutit marluk ikiaroornartoq hashi pillugu tigummigallarneqartut oqaatigisinnaavarput, politiit ikiaroornartumik akiuiniartut pisortaat Finn Jeppesen oqarpoq.
Politiit paasissutissanik annertunerusumik maannakkut tunniusserusunngikkallarput, angutit ukiui kiisalu ikiaroornartup haship annertussusaa aamma oqaatigiumanngilaat, suliami misissueqqissaarnerit suli ingerlanneqarmata.