Ikiaroornartumik hashilerisut
Politiit tallimanngornermi ualikkut unnukkullu hasheerniaqarnersoq misissuillutik illoqarfiup qeqqani angalaarput. Ulloq naasoq paasinarsivoq inuit tallimat hashimik tigummiaqarlutillu tuniniaasimasut tigusarisimagaat eqqartuussivitsigullu malersorneqartussanngortillugit.
Angut politiit biiliinut quisoq
Politiit Aqqusinersuup ilaani imerniartarfinnik misissuitillutik biilitik biilit unittarfianut qimappaat. Anigamik takulerpaat angut 22-nik ukiulik biiliminnut quiuataartoq. Uparuarneqarami qimaalermat politiit Hotel Godthåbip eqqaani tigusaraat politiit pinerluttulerinermi inatsisaannik unioqqutitsisimasutut unnerluutigisassanngortinneqarluni.
Angutilli misissuiffigeqqissaarneqarnerani paasineqarpoq hashiminernik katillugit 0,34 grammiusunik kaasarfimmioqartoq. Politiit inatsisaannik unioqqutitsisimanermut tunngasumi pineqaatissinneqarnissami saniatigut angut ikiaroornartumik tigummiaqarsimasutut aamma pineqaatissinneqassaaq.