Ikiaroornartumik eqqusseriaraluartoq
Arnaq 29-nik ukiulik ippassaq Nuup mittarfiani ikiaroornartumik kiilumik ataatsimik qiterminut toqqorlugu eqqusseriaraluartoq tigusarineqarpoq.
Allattoq Elisa Isaksen
Arnaq Danmarkimiit tikittoq ippassaq ataasinngulersoq tigusarineqartoq Sermitsiaq nittartakkamini allappoq.
- Ikiaroornartoq arnap 29-nik ukiullip qitermiorigaa nassaaraarput, politiit ikiaroornartulerisut pisortaat Finn Jeppesen oqarpoq.
Arsaarinninneq pilertortumik suliarineqarpoq, tassa arnaq Nuup Eqqartuussiviani qaammatini sisamani pinerluuteqarsimasunut inissiisarfimmiittussanngorlugu pineqaatissinneqareersimammat.
- Pisimasumut oqariartuutigisarput unaavoq: Taamaaliortaqinasi, tamanna imminut akilersinnaanngilaq, politiit ikiaroornartulerisut pisortaat Finn Jeppesen oqarpoq.