Ikiaroornartumik atuinerujussuaq Ilinniarfiup ittuata iliuuseqarfigeqquaa
- Ajornartorsiut angeqimmat Imarsiornermik Ilinniarfimmiit qisuariartariaqarpugut, Jeppe Carstensen oqarpoq.
Atuartut ilinniartullu ikiaroornartumik pujortartarneq ulluinnarsiutigigaat, soorlu nerinertut sininnertullu pisariaqartitatut, Imarsiornermi Ilinniarfimmi maluginiarneqarsimavoq
- Paamiuni ajornartorsiuterujussuuvoq. Ilinniartut quliungaangata arfinillit atuisuusartut misissuinerit takutippaat. Ilaallu ikiaroorlutik atuariartortartut naammattoorneqartarlutik. Umiarsuanut naalaganngorniartuni Nuummi aamma ajornartorsiutaavoq, taakkunani ilinniartut sisamaangaangasa ataaseq atuisuusartoq, Jeppe Carstensenip KNR-imut oqaatigaa.
Aamma atuaruk Dorisip kommunit tamaasa aanngaajaarniutit pillugit politikkeqalersikkusukkai
- Tamanna sorusussuseqannginnikkut kajumikkunnaarnikkut ersertarpoq. Ullaakkut makittarunnaartarput. Atuariartortarunnaartarput. Naggataatigullu misilitsinnerni angusinngitsoorlutik, Atuarfiup ittua oqaluttuarpoq.
Uummannami aalisartut piniartullu ilinniarfianni ikiaroornartoq ajornartorsiutaanersoq kisitsisaatigineqanngilaq. Taamaattorli angalaartillutik ikiaroortoqartartoq ilisimaarineqarluni.
- Nalunngilara aalisariutini sulinermi aqqaneq marloriarluni ajutoortoqarsimasoq, Umiartorneq pillugu aqutsisoqarfimmut siorna nalunaarutigineqartunik. Imaanngilaq, tassa ikiaroorsimagamik. Oqaannarpunga, aanngajaarniutinik atuisunik inuttaqaruit ajutoornissaq qaninneruvoq.
Ikiaroornartumik atueqqusinngilluinnarneq Jeppe Carstensenip Imarsiornermi Ilinniarfimmi ineqarfiutaanilu malittarisassanngortissimavaa.
- Silattoqqasunik sulisoqartariaqarpugut. Ulorianartunik sulliveqarpugut, inuttat sillimajuartariaqarlutik, Jeppe Carstensen oqarpoq
Aamma atuaruk VIDEO Meeqqat inuusuttullu ikiaroornartumik atornerluinerat eqqummaariffigineqarpoq
Imarsiornermi Ilinniarfiup pisortaa siullermeerluni politikkerinut, isumaginninnermut siunnersortinut, suliffissarsiuussisarfinnut, oqartussanut suliffeqarfinnut minnerunngitsumillu angajoqqaanut ikioqquvoq.
Siunnersuisarneq pimoorunneqarnerusariaqarpoq, katsorsaasarnerillu periarfissaqarluarnerusariaqartut Jeppe Carstensen isumaqarpoq. Politiillumi aamma akuleruttariaqartut isumaqarpoq.
- Tuniniaasinnaaneq unitsinniarlugu, politiit aamma immaqa akuliuttariaqarput. Aamma akileraartarnermi oqartussat akuliussinnaapput aperalutik, inuit isertitaqanngitsut qanoq ilillutik biilerujussuaqarsinnaappat?, Jeppe Carstensen aperivoq.
Tassa inuiaqatigiit tamarmiusut iliuuseqartariaqarput. Ikiaroortarnerli inuiaqatigiit akueriinnarsimarpasippaat. Taamaattussaannartut isigineqarlersimalluni.
