Ikiaroornartumik atuineq aalaakkaavoq

Politiit ikiaroornartulerinermi unioqqutitsinernik suliaat arsaarinnissutaalluunniit ukiumiit ukiumut allanngorpiarneq ajorput, tassa arsaarinnissutit unioqqutitsinerillu 550-it missaaniittarmata.
Allattoq Apollo Jeremiassen
januaarip 05-at 2011 07:11

Taama Peqqissutsimut Naalakkersuisoq, Agathe Fontain, Kristian Jeremiassenip, Siumumeersup, paragraf 36 aqqutigalugu apeqqutaanut akissuteqarpoq.

Pitsanngoriaateqalaartorli Naalakkersuisup akissummini oqaatigaa, tassalu misissuisitsinerup takutissimammagu inuit hashimik misiliillutik pujortartartut ikileriarsimasut. Ikileriaat 10 procentiuvoq.

- Illuatungaatigulli peqqinnissaqarfiup suliniuteqarnermini paasisimavaa ilaqutariinni akuttunngitsumik hashimik pujortartoqartartoq. Illuatungaatigulli paasinarsivoq ilaqutariit ikiaroornartumik pujortartartut imerpallaanngitsut, Agathe Fontain taama allappoq.

Ikiaroornartup haship ulorianaataasa inuiaqatigiinnut paasissutigineqarluarnissaat, Imigassaq aamma Ikiaroornartoq pillugu ataatsimiisitaliap innersuussutigaa. Agathe Fontainillu oqaatigaa, ukioq manna januaarimiit aallartittumik paasisitsiniaaneq TV-kkut aallartissasoq, tassanilu paasisitsiniaatigineqassalluni ikiaroornartup haship timikkut, tarnikkut aamma inooqatigiinnikkut sunniutigisinnaasai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq