Ikiaroornartuliassanik naatitsivik nassaarineqartoq

Nuummi Politiit arfininngormat ualikkut Blok P-imi inissiat ilaanni naasunik ikiaroornartuliassanik naatitanik 26-nik 783 gramminillu oqimaassusilinnik arsaarinnipput. Politiit suliamut allamut tillinniarnermut tunngasumik suliaqarlutik, ikiaroornartuliassanik naatitsivimmik nassaarput. Ini ikiaroornartunik naatitsivik, naasunik ikiaroornartuliassanik ulikkaangajavissimavoq, qulliit, imerterutit silaannaallu kissassusaanik uuttuutit inimi nassaassaapput. -Atortorissaarutit naasullu arsaarinnissutigaagut, INI A/S-imullu ikiaroornartuliassanik inissiaq naatitsiviusarnera nalumaarutigaarput, Politeeqarfiup pisortaa Bent Heisselberg oqarpoq.