Ikiaroornartulerisut eqqartuussaaqqipput

Annertuumik ikiaroornartulerisimaneq pillugu qaammatinngungajalersup matuma siorna eqqartuussivimmi pisoq nunatta eqqartuussiviani nanginneqarpoq.

Unnerluutigineqartut angutit pingasut illersuisutik peqatigalugit ippassaq sassartinneqarput.

Oqaatigineqarporlu kingullermik eqqartuussivimmi killisiuneqarneratuulli uteqattaarisoqanngitsoq.

Nunatta eqqartuussiviani eqqartuussinermi unnerluutigineqartoq ataaseq Ilulissaneersoq aalajangiusimallugu oqartuarsimagaluarpoq angutit taakku pineqartut pingasuullutik ikioqatigiissimanerarlugit, taassumali Nunatta eqqartuussiviani isummani allanngortissimagaa oqaatigineqarpoq.

Taanna ippassaq oqaluttuarsimavoq, ikiaroornartumik tikisitsilertillutik ilaatigut angutit marluk kisimik tikisitsisarsimasut pingajuatagooq nuliaminut paasitittoornissani assut annilaangagisarsimammagu.

Aammattaaq eqqartuussinerup ingerlanerani imminnut ataqatigiinngitsunik nassuiaasoqalersimasoq oqaluttuarineqarpoq, angutip unnerluutigineqartup aappaa ikiaroornartumik annertuumik nassitseqataanerarsimasoq aappaa peqataanerarsimanngilaq.

Angutit marluk kisimik ippassaq eqqartuunneqarput. Pingajuat ullumi eqqartuunneqassaaq.