Ikiaroornartuerniat tallimat tigusarineqarput
Inuit tallimat anngiortumik ikiaroornartunik nunatsinnut eqqussuillutillu tuniniaasarsimasut sapaatip-akunnerata naanerani tigusarineqarput.
Nunatsinni politimesterip Steen Thomsenip oqarnera malillugu, ukiuni pingasuni kingullerni atorfeqarnermini anngiortumik ikiaroornartumik tuniniaanerit aaqqissuussat annersaasa ilaat taamaasilluni unitsinneqartoq.
Politiinit tigusarineqartut marluk Ilulissani najugaqartuupput, ataaseq Nuummi, ataaserlu Qaqortumi Københavnimilu aamma ataaseq tigusaasimapput.
Paasisagut malillugit Ilulissani imerniartarfimmik attartortoq tigusanut ilaavoq, taassumalu illua imerniartarfillu attartugaa ulluni kingullerni misissuiffigineqarsimapput, ikiaroornartunik nassaarnermik kingunilimmik.
Misissuinerit sukumiinerusumik ingerlanneqarneranni Ilulissaneersut marluk Nuummeersorlu ataaseq matoqqasumik inissinneqarsimapput, taamatuttaaq Qaqortumeersoq Københavnimeersorlu ulluni 14-niniit qaammat ataaseq angullugu matoqqasumik tigummineqartussaapput.
Politimesteri Steen Thomsen oqarpoq, ukiuni kingullerni anngiortumik ikiaroornartumik tuniniaanerit sukumiinerusumik misissuiffigineqalernerisa kingunerisa ilagilluinnaraat massakkut annertuumik aaqqissuussamillu tuniniaanerit ingerlanneqartut inunnit kikkunnit sumilu pinersut qulaajaavigalugit unitsinneqarmata.
Ilulissani, Nuummi, Qaqortumi Københavnimilu politiit ilaatigut ukioq ilivitsoq misissuilluarnerisigut inuit tallimat ataatsikkut naalagaaffeqatigiinnerup iluani sumiiffinni assigiinngitsuneersut taamaasillutik tigusarineqartut, politimesteri oqarpoq.
