Ikiaroornartuerniarsimasut sakkortunerusumik pillagaassapput
Ikiaroornartumik hashimik anngiortumik eqqussuisimasut Nunatta Eqqartuussiviani eqqartuussaanerat ullumi naammassivoq. Unnerluutigineqartut pingasuusut ilaannut marlunnut pineqaatissiinerit Nunatta Eqqartuussiviani sukannernerusumik inerneqarput.
Hashimik anngiortumik eqqussuisimasutut Nunatta Eqqartussiviani eqqartuunneqartut tassaapput, politiiusimasut Aputsiaq Davidsen aamma Ivik Knudsen Ostermann, taakku tamarmik ukiuni pingasuni pineqaatissinneqarsimasunut inissiisarfimmiittussanngorlugit eqqartuunneqarput.
Kredsrettimi eqqartuussisoqaqqaarmat pineqartut ukiut aappaat avillugu ukiunilu marlunni inissiisarfimmiittussanngortitaagaluarput, Nunattali Eqqartuussiviani eqqartuussineq sukannernerusumik tassa inerneqarpoq, pineqartut politiitut sulisimanerat tunngavigineqarluni.
Unnerluutigineqartut pingajuat Torben Hyldegaard, Kredsrettimi eqqartuussaagami ukiuni sisamani pineqaatissinneqarsimasunut inissiisarfimiittussanngortitaagaluarpoq, paasiniaarnermili sivisuumik matoqqasumik isertitsivimmiititaasimanera pissutigalugu, pineqaatissinneqarsimasunut inissiisarfimmiinnissaa ukiunut pingasunut affarmullu sivikillineqarpoq.
Hashimik angiortumik eqqussuisimanermut suliami aningaasartuutigineqarsimasut pineqaatissinneqartunut aamma akiligassanngortitsissutigineqarput.
