Ikiaroornartuerniaq paasisaasoq

Politiit sisamat Qaqortumeersut qimmerlu ikiaroornartulerinermi atorneqartartoq politiit angallataannik pingasunngormat decembarip 29-ani Narsaliarput, tassanilu ikiaroornartoq hashi 205 grammisut oqimaatsigisoq aningaasallu 28.000 koruunit arsaarinnissutigalugit.

- Narsami innuttaasunit kalerrinneqarpugut ikiaroornartuerniartoqartoq, Qaqortup politeeqarfiani pisortaq, Bent Ole Kleist KNR-imut taama oqaluttuarpoq.

Politiit pakasaallutik pasisaminni misissuipput, misissuinermilu ikiaroornartoq pasisap toqqorsimasaa qimmip narajorlugu nassaaraa.

- Angut misissuiffigineqartoq erngerluni nassuerpoq killisiorneqareeramilu iperagaalluni. Ikiaroornartulerisimanerminulli unnerluutigineqassaaq, Bent Ole Kleist oqarpoq.

Taassuma ilanngullugu oqaluttuaraa Narsami, Qaqortumi Nanortalimmilu ullut makku eqqissisimaarfiusut. Naak angerlarsimaffinni eqqissiviilliortoqartaraluartoq sakkortuuliorfiunngitsumik.

- Neriuppugut ukiutoqqap ukiortaallu ullui aamma taama eqqissisimanartigiumaartut, Kujataani politiit ukiortaami inuulluaqqusillutik taama nalunaaruteqarput.