Ikerasassuaq allanngutsaaliorniarneqalerpoq
Ikerasassuup taassuma allanngutsaaliorneqarneratigut pinngortitaq Issittumiittoq immikkuullarilluinnartorlu illersorniarneqarpoq.
Canadami naalakkersuisut, Nunavummi naalakkersuisut naggueqatigiillu Inuit suliniaqatigiiffiat Qikiqtani Inuit Association suleqatigalugit pilersaarutit piviusunngortinnialerpaat, aningaasallu 25 millionit koruunit missaat aningaasaliissutigineqarput.
Ikerasassuup Tallorutip Imartaata eqqissisimatitanngortinneqarnissaa, naggueqatigiit Inuit tamaani najugallit ukiorpassuarni piumasariuarsimavaat, tamatumalu piviusunngortinneqarnissaa Canadap avatangiisinut ministeriata Jim Prenticep sukataarutiginialerpaa:
- Silap pissusaa allanngoriartuinnarpoq, taamaanneranilu Sullualuup angallaffigineqarnerulernissaa naatsorsuutigisariaqarluni.
Canadap issittortaata mianerineqarnerulernissaa suliniutigissavarput, Jim Prentice The Globe and Mailimut taama oqarpoq.
Lancaster Soundili pillugu assortuuttoqartuarsinnarpoq.
Tallorutip Imartaa Canadamit oqartussaaffigineqarani nunat tamalaat oqartussaaffiattut USA-mit Ruslandimillu nalilerneqarpoq. Canadami aviisip The Globe and Mail-ip nittartagaani taama allaaserinnittoqarpoq.