Ignatius timmisartup motooria unimmat ilaavoq: Ilaquttakka tamaasa eqqarsaatigaakka

Timmisartoq Kulusummut ingerlaaruttorluni, tassanngaannaq qanngorpallassuarmik nipimik tutsiuttoqarpoq.

- Qanngorpallattorsuummat tamaavitta nipaaruppugut, sunaaffa uuliamut attavia ammarsimasoq nungukkiartorluni.

Ilaasut ilaat, Ignatius Mathiassen, taama oqaluttuarpoq.

Air Greenlandip timmisartuutaa Dash 8 normu 632, Nuummiit Kulusummut ingerlartoq motooriminik unittoormat, ilaasut 21-t nipaarupput. Ignatius Mathiassenillu oqaluttuarnera naapertorlugu taanna tupassimaqaaq.

- Oqarpallappoq suluata illuatungaa unittoq, takuarpummi. Silatitsinniittoq sarpik unittoq takuara eqqaani issiagama. Sunaaffa uuliamut attaveqaat ajoqusersimasoq. Ammarluni uuliaagooq nungukkiartorluni. Kingunitsianngualu sarpik univilluni unippoq.

Apuulluartut

Timmisartup motooria unitsinneqarmat sulualu unimmat, ikumasoq nammineq qamissimavoq. Timmisartorlu Nuummut utertariaqalerluni.

Ignatius Mathiassen Sanami misissortereerluni angerlarluni aallaraluarpoq, pisullu nalaani ilaquttani eqqarsaatigisimaqai.

- Ullumikkut angerlarlunga aallaraluarpunga, Sanamut nakorsiareerlunga. Ilaquttakka tamaasa eqqarsaatigaakka.

Ignatius Matsiassen taama oqarpoq imalu nangilluni.

- Aquttoq pikkoreqaaq, isumaqaraluarpunga assaakaasuata illuatungaa ammukarsinnaanavianngitsoq. Mikkiartuleratta takuara ammut aallartoq, ajunngitsumik.