Igitsinimut kiffaanngissuseqalernissaq naamasinnaanngorpaat

Pissutsit nalinginnaasumik ingerlaqqilernissaannut, Inatsisit immikkut ittumik inatsisiliarineqarsimasut, Igitsinimiut kiffaanngissuseqarnerannut ukiuni kingullerni 30-ni sakkortuumik killilersuisimasut, atorunnaarsinneqarnissaat sakkutuut neriorsuutigaat.

Akerliussutsimik takutitsisut atorfillit peqquserluttuliortarnerannut akerliuniarnerat aamma kiffaanngissuseqarnissaminnik piumasaqarnerat sakkutuunit akuersaarneqarput. Akerliussutsimillu takutitsisut eqqartuussivitsigut malersorneqannginnissaat, sakkutuut neriorsuutigaat. Aamma pilertortumik naqisimaneqanngitsumik qinersisitsisoqarnissaa neriorsuutigaat. Tamatumalu peqatigisaanik akerliussutsimik takutitsisut angerlakaanissaannik kajumissaarpaat. Tamanna kajumissaarutaanersoq naalakkiutaanersorluunniit, nalunaaquttap akunnerini tulliuttuni paasinarsissaaq.

Akerliussutsimik takutitseqattaarnerit taamaatinneqarnissaat, kisermaassillutik naalakkersuisut kissaatigigaluaraat, tamanna akerliussutsimik takutitsisut soqutigerpasinngilaat.

Mubarakip tunuarnerminik ippassaq nalunaaruteqannginnera, akerliussutsimik takutitsisunit pakatsissutigineqarnera ullumikkut malunnaqaaq. Akerliussutsimik takutitsisut ullumi 7 millioninik amerlassuseqassangatinneqartut oqaatigineqarpoq, tassa Kairomiut pingasuugaangata ataaseq akerliussutsimik takutitseqataassaaq.

Akerliussutsimik takutitsisut præsidentip illorsuanut aamma naalagaaffiup tv-qarfiata qullersaqarfianut qanilliartortut nalunaarutigineqarpoq.

Ippassaq isumallualeraluarneq qatangiinnarpoq. Akerliussutsimillu takutitsisut ilungersornerat ingerlaqqissaaq, tamannalu aammik kuisinertaqassanerpoq ullup ingerlanerani paasinarsissaaq.