Igasoq tusaamasaq Naalagaaffiit Peqatigiinnut saaffiginnippoq
- Immaqa kinaasunga nalugaluarpat, taamaattorli ukiuni arlalinni meeqqat nerisartagaasa pitsanngorsaavigineqarnissaat pillugit, USA-mi, Tuluit Nunaanni Australiamilu naalakkersuisut oqaloqatigisarpakka, taamaalilluni nunarsuatsinni pualavallaalertarneq, meerartatsinnik ulorianartorsiortitsisoq, iliuuseqarfigineqarsinnaaniassammat, igasoq taanna Naalagaaffiit Peqatigiit pisortaanut taama allannerarlugu, aviisimi Daily Telegraphimi issuarneqarpoq.
Nunarsuatsinni meeqqat atuarfinni nerisartagaasa pitsaanerulernissaat, peqqinnarnerusumillu inuuneqarnissaat, Jamie Oliverip piumasaraa.
- Nerisakilliorlutik toqquteqartunit, pualavallaarneq toqussutaanerusalereerpoq, Jamie Oliver Ban Ki-moonimut ammasumik allakkamini allappoq.
Naalagaaffiit Peqatigiit New Yorkimi maanna ataatsimiileruttorput, "nappaatit tuniluuttuunngitsut" oqallisigineqarlutik.
- Nappaatit inuunermi pissusilersuutinik pissuteqartut ineriartornermut aarlerinartorsiortitsipput. Taakkulu piitsunut sunnertiasunullu ingammik eqquisarput, Naalagaaffiit Peqatigiit pisortaat oqarpoq.