Icesave pillugu isumaqatiginninniarnerit nangeqqipput
Islandimi suliassaq Icesavemut tunngasoq naammassineqareertinnagu, Island nunat siuarsagassat taarsigassarsiniartarfiannit IMF-imit taarsigassarsisinnaanngilaq, tamannalu aaqqiagiinngissutaatillugu EU-mut ilaasortanngorniarneq ajornakusoorpoq.
Icesave tassaavoq Islandimiut internetikkut aningaaseriviat 2008-mi upernaakkut akiliisinnaajunnaarluni unittoq. Taamanikkut Hollandimi Tuluillu Nunaanni oqartussat Icesavep sullitaannut milliarderpassuarnik qularnaveeqqusiipput.
Aningaasarpassuit atukkiunneqartut Islandip utertittussaavai, piumasaqaatigineqartulli isumaqatigiinngissutaaqaat.
Altingemi amerlanerussuteqalaartut taarsersuinissamut piumasaqaatit akuersissutigigaluarpaat, kisianni tamatuma kingornagut sapaatip akunnera qaangiutiinnartoq præsident Olafur Grimssonip inatsimmut naaggaarsinnaatitaanini atorlugu siunnersuut itigartippaa. Taamaattumik tamanna marsip arfernanni innuttaasunit taasissutigineqartussaavoq.
Taamaattorli nutaamik pitsaanerusumillu isumaqatigiissusiortoqarneratigut innuttaasunik taasisitsinissaq pinngitsoortinneqarsinnaavoq. Tamannalumi angalaqatigiit ullummikkut anguniartussaavaat.
