ICC Washingtonimi ataatsimiilerpoq

Inuit Issittormiut Siunnersuisoqatigiiffianni, ICC-mi, siulersuisut Washingtonimi ullumi aqagulu ataatsimiissapput.

ICC-p siulersuisuisa ukioq manna ataatsimiinnerisa siullersaat Washingtonimi pisussanngortinneqarpoq, illoqarfik taanna USA-mi illoqarfiit pingaarnersarimmassuk, inatsisartoqarfiulluni naalakkersuisoqarfiullunilu. Siulersuisut ataatsimiinnerisa saniatigut USA-mi Kongresimi ilaasortanik ataatsimeeqateqarnissaq pilersaarutinut aamma ilaavoq.

- Ataatsimiinnissatta Washingtonimut inissinneqarnera isumaqarpunga ajunngilluinnartoq, pingaartumik suliatta ilaat pingaarutillit, soorlu nunat inoqqaavisa pisinnaatitaaffii Naalagaaffiit Peqatigiinnit suli akuersissutigineqangitsut, USA-llu naalakkersuisuinit tapersorneqanngitsut, silap allanngoriartupiloorneranut tunngasut, allallu, Kongresimi ilaasortat kiinarsillugit oqaloqatigiissutigisinnaagatsigik, Inuit Issittormiut Siunnersuisoqatigiiffianni, ICC-mi, Kalaallit Nunaanni siulittaasoq, Aqqaluk Lynge, oqarpoq.

Issittumut nunarsuaq tamakkerlugu ukiorititaq ullut arlaqanngitsunnguit qaangiuppata aallartissaaq – tassa marsip ulluisa aallaqqaataanni – tamanna ICC-p ataatsimiinnerani aamma oqaluuserineqassaaq, taanna ICC-mit qanoq atorluarneqassanersoq suliassat pingaartut aamma ilagaat, Alaskami Barrowimi aasaq ataatsimeersuarnermi suliassat eqqartorneqarmata.

ICC Kalaallit Nunaanni 2010-mi ataatsimeersuassaaq.