ICC uuliamut politikki pillugu: Socialdemokratiskimik ingerlatsinermut tulluanngilaq
Tamanna iluaqutissartaqarsinnaagaluartoq Kalaallit Nunaannut socialdemokratiskiusumut naleqquttuunngitsoq, ICC-p siulittaasua Aqqaluk Lynge isumaqarpoq.
Aviisip Politikenip Alaskami uuliasiornerup naggueqatigiinnut inunnut sunniutai pillugit allaaserisaanut tunngatillugu kalaallit ataasiakkaat uuliasioqatigiiffimmut piginneqataalersinnissaat sooq naleqquttuunngitsoq nassuiaateqarfigaa.
Ingerlatseriaaseq imaaliallaannaq eqqunneqarsinnaanngilaq
- Kalaallit Nunaat Alaskalu assigiinngissuteqarput. Uagut socialiademokratiskiusumik ingerlatsivugut, Alaskamilu kapitalismi tunngavigalugu inuiaqatigiit piniartukkormiut periaasii malillugit ingerlatsisoqarluni. Tamannalu imaaliallaannaq eqqunneqarsinnaanngilaq, Aqqaluk Lynge Politikenimut oqarpoq.
ICC-lli siulittaasuata taamatut pisoqarsinnaanera tunuartivissunngilaa, pisuussutimmi tamanit pigineqalersinnissaat Alaskami iluatsinneqarsinnaasimammat. Assersuutigalugumi USA-mi uuliasiornermit aningaasatigut iluanaaruteqartartut ikitsuinnaapput.
- Immaqami ingerlatsivinnik innuttaasut piginneqataassutinik piginneqataaffigisaannik pilersitsisoqarsinnaavoq, Aqqaluk Lynge oqarpoq, Alaskami naggueqatigiit inuit uuliasioqatigiiffii ingerlalluartut innersuussutigalugit.
- Nunatsinnili oqallittoqarnerunissaa innuttaasunillu peqataatitsinerunissaq pisariaqartipparput, aamma tamatuma aqunnissaanut sulisussatigut ikippallaarpugut, Politikenimut oqarpoq.