ICC: Suliniut pingaarutilik
- Iluarisimaarparput taamatut saqqummiussisoqarnialermat. Taamatut aalajangiisimaneq tassa issittumi pisuussutinik inuit nunaanni iluaquteqarneq pillugu inuit tunngaviusumik najoqqutassatut nalunaarutaat, tassani nalunaarummi tamakkua periuutsit aamma eqqartorneqarput, taamaattumillu una alloriarneq tassunga tulluartorujussuartutut isigaarput. Aatsaat saqqummiussassaq takugutsigu iluamik nalilersinnaassavarput, ukununnga najoqqutassanut naleqqunnersoq, ICC-mi inuit pisinnaatitaaffii pillugit ataqatigiissaarisoq, Sara Olsvig oqarpoq. Taamaakkaluartoq tamanut saqqummiussinerup ICC tunuartinnavianngilaa:
- Neriuppugut taamatut qisuariarneq kingulliussanngitsoq, tassa ammasumik paasinartumik ingerlatsinermi isornartorsiuisut tusarnaarlugit aammalu apeqquteqarsimagaangata apeqqutai akillugit ingerlatsineq taanna iluarisimaarparput. Taavalu aamma neriuppugut periuutsit iliuutsillu siunissami atorneqartussat aamma taamatut ingerlassasut ammasumik paasinartumik apeqquteqartoqaraangallu aamma akineqarsinnaasarlutik. Taamaattumik neriuppugut una alloriarneq siulliussasoq ammanerusumik paasinarnerusumillu ingerlatsinerup tungaanut, minnerunngitsumik aatsitassarsiornerup tungaatigut, Sara Olsvig oqarpoq.
Pilersaarutit naammaginarnersut maannakkut ICC-miit oqaatigineqarsinnaanngillat:
- Tassa tamanna aatsaat oqaaseqarfigisinnaassavarput saqqummiussassat takoreerutsigit. Taakkuli takugutsigit ilisimasagut allat nunarsuarmioqatitta ingerlatseriaasii uagut misissortakkatsinnut naleqqiutereerutsigit maani ingerlatseriaatsit saqqummiunneqartussat aatsaat iluamik saqqummiunneqartoq iluarisimaassaneripput oqaaseqarfigisinnaassavarput. Maannakkulli saqqummiunneqarnissaa ICC-miit nuannaarutigaarput nunatsinni pisariaqartinneqarmat aatsitassat tungaatigut ammasumik paasinartumillu ingerlatsisoqarnissaa, Sara Olsvig oqarpoq.
Oqaatigissavarput, Sara Olsvig IA-miit folketingemut qineqqusaartutut oqaaseqanngimmat, uanilu ICC tunuliaqutaralugu oqaaseqarmat.
