ICC: Pisinnaatitaaffiit pillugit paasiniaasarfeqalerli

Inuit pisinnaatitaaffii pillugit Nuummi Katuami ataasinngormat tusarniaasoqarmat Inuit Pisinnaatitaaffii Pillugit Paasiniaasarfimmik pilersitsisoqarnissaa pisariaqartoq peqataasut ilaannit taaneqarpoq, tamannalu Inuit Issittormiut Siunnersuisoqatigiiffiannit maanna taperserneqarpoq.

Inuit pisinnaatitaaffii pillugit paasiniaasarfimmik Nunatsinni pilersitsisoqarnissaa, Inatsisartut 2008-mili akuersissutigereeraat ilanngullugu tikkuarpaat.

Taamaammat tamatuma piaartumik piviusunngortinneqarnissaa ICC-p innersuussutigaa.

Inuit pisinnaatitaaffii pillugit naalagaaffeqatigiinni maannamut paasiniaasarfituaasoq tassaavoq Dansk Institut for Menneskerettigheder. Tamannali ICC-p naammaginngilaa.

Nunatsinni oqaatsit atorneqartut atorlugit Nunatsinnilu pissutsinut tulluarsakkamik, paasiniaasarfimmik pilersitsinikkut, inuit pisinnaatitaaffiinik suliaqarneq qulakkeerneqassasoq, ICC-p tunngavilersuutigaa.

Inuit pisinnaatitaaffii pillugit paasiniaasarfik tassaassaaq Naalagaaffimmit sunnersimaneqarani, inuit pisinnaatitaaffii pillugit innuttaasunut paasisitsiniaasinnaasoq, unioqqutitsinernillu nakkutilliisinnaasoq.