ICC-p Siuttutut Sulilluartunut Nersornaat Hans-Pavia Rosingip aqqani pilersikkaa

ICC-p siulittaasorisimasaa siullerpaaq Hans-Pavia Rosing ataqqiniarlugu naggueqatigiit Inuit akornanni siuttutut sulilluartunut 30-llu ataallugit ukiulinnut nersornaat ICC-p siulersuisuunerisa pilersippaat.
Nersornaammik tunineqartut Alaskami, Canadami, Tjukotkami Nunatsinnilu najugaqartuusinnaapput. Toqqorsivimmit assi
Allattoq Karsten Sommer
aggustip 27-at 2019 09:06

Nersornaatip siunertaa tassaavoq ”Inuit inuusuttut arnat angutillu sutigut assigiinngitsutigut ineriartornerat tapersersussallugu, soorlu utoqqarnik ilisimasalinnik peqateqarluni piniarnermut piginnaanngorsarnerit, qaffasinnerusumik ilinniagaqarneq kiisalu soorlu ammerinermut Inuit ileqqutoqaannik, suleriaasiinik pingaartitaannullu allanut piginnaanngorsarnerit tapersersussallugit”.

ICC taama nalunaaruteqarpoq.

Inuit Nunaanni naggueqatigiit Inuit Alaskami, Canadami, Tjukotkami Nunatsinnilu najugallit nersornaammik tunineqarsinnaassapput.

Nersornaatisisussatut inassuteqaatit kingusinnerpaamik ukioq manna aallarnerfigalugu ukiut tamaasa oktobarip aallaqqaataani tunniunneqartassapput toqqagaasullu ukiup tulliani januarip ulluisa 15-anni saqqummiunneqartassallutik.

Hans Pavia Rosing 70-inik ukioqarluni siorna toquvoq, ICC-milu 1980-imit 1986-ip tungaanut siulittaasuulluni.

Nersornaasigassamik inassuteqarniaraani immersugassaq nassuiaatitalik Facebookitsinni “iccgreenland” iserfigalugu aaneqarsinnaavoq imaluunniit iccgreenland@inuit.org aqqutigalugu allagaqarnikkut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq