ICC-p Inuit pisinnaatitaaffii pillugit allattoqarfik pilersinniarpaa
Ilinniartut Kalaallit Nunaanneersut ilisimatusarsinnaassapput, soorlu aamma nunanit allaneersut ilisimatusarsinnaassasut. Ilisimatuussutsikkut suliallit ilisimatusarfittaassami aamma ilisimatusarsinnaassapput.
Ilisimatusartut Nunatsinneersut taamaaliornikkut periarfissinneqassapput, soorluttaaq nunani allaneersut periarfissaqalissasut Kalaallit Inuillu inooriaasiannik kultuuriannillu paasinninnerunissamut. Qangaaniit ilisimasat pillugit katersivimmik pilersitsisoqassaammat.
Ilisimatusarfittaassaq universitetinik suleqatiserinnissaaq, ilisimatusarfiillu allat aamma suleqatigilissallugit. Ilisimatuut Nuummut aamma tikeraarsarneqartalernissaat takorloorneqarpoq.
Inuit Issittormiut Siunnersuisoqatigiivi Nunat Inoqqaavisa pisinnaatitaaffii pillugit sulinermi siuttuujuarsimasoq. Nunat inoqqaavisa allat nunarsuarmi inuit pisinnaatitaaffii pillugit suleqataaniarneranni aqqutissiueqataasarsimavoq. Allat suleqatigalugit, ICC pilersitsinermi siuttuusimavoq Naalagaaffiit Peqatigiit Nunat Inoqqaavi Pillugit Ataatsimiittartoqatigiivinik 2002-mi pilersitsinermi aammalu Naalagaaffiit Peqatigiit Nunat Inoqqaavisa Pisinnaatitaaffii pillugit Nalunaarutaata, septembarimi 2007-mi akuersissutigineqartup pilersinniarnerani.
