ICC nunatsinni: Eva Aariak inuppalaarlunilu oqaloqatikkuminaqaaq
Eva Aariak Qeqertaalummi illoqarfimmi, Ippiarjuk-mi inunngorpoq, ukiulli kingulliit 22-t Iqalunni najugaqarsimalluni – Sisamanik meeraqarpoq ernutaqarlunilu. Ulluinnarni inuit sanalugaannik Iqalunni pisiniarfiuteqarpoq.
Aqqaluk Lyngep Eva Aariak inuttut nalunngilluarpaa:
-Eva Aariak ICC-mi Inuit oqaasii pillugit ataatsimiititaliarsuatsinni ilaasortaanikuuvoq uanga præsidentiunerma nalaani, kingorna Nunavumi naalakkersuisoqaleramik 1999-p kingorna inuit oqaasii pillugit ataatsimiititaliarsuarmi taakani kommissæriulluni, tassa siulittaasuujutaa pisortaasoq. Tassuunakkut qanittuaqqamik ilisimavarput, nunatsinnullu suleqataasimavoq ilaatigut oqaatsit allattaaserlu pillugit annertuumik suleqatigisimallutigu, taamaattumik neriulluarfigisorujussuuarput, aamma inoqatitsinnut Canadamiittunut sunniuteqangaatsiassasoq ilimagivarput.
Eva oqaatsit pillugit kulturikkullu ilisimasarpassuarmi saniatigut inuppalaartuuvoq, qanikkuminarluni oqaloqatikkuminarlunilu. Neriuutigaara ilisimallugulu aamma naggueqatitta akornanni soorunalimi aamma inuuniarnikkut inuusaatsikkullu ajornartorsiutit taama annertoreertigisut pulaffigigamigit, naalakkersuisunikkut naak siullerpaamik qinigaangaluarluni qularutiginngilara ajunngitsumik assut sunniuteqarsinnaajumaartoq inoqatitsinnut Nunavumi.
