ICC: Namminersorneq immikkuullarissuuvoq assissaqanngitsoq
- Oqaluttuarisaanermi siullerpaamik nunasiaasimasup innuttaasa ilai immikkut inuiaassuseqarnerat akuersaarneqartussaapput. Oqaatsivut naligiissumik pisortatigoortumik aamma atorneqarsinnaalissapput. Aamma pisuussutitsinnik nunatsinni nammineq aqutsilissaagut, tamannalu nunarsuarmioqatitsinnut pingaaruteqartussaavoq, Aqqaluk Lynge oqarpoq.
Kalaallit danskillu politikerii isumaqatigiilluinnarlutik Danmarkimi tunngaviusumik inatsit, aallaavigisimagaat, taamaalillunilu danskit naalagaaffiata ataasiussusia innarlerneqassanngitsoq, Inuit Issittormiut Kattuffiata Kalaallit Nunaanni siulittaasuata tikkuarpaa.
- Aappassaanik, inuiassuit aalajangersagaat naapertorlugit uagut inuiaassuserput akuersaarneqartoq aallaavigalugu isumaqatigiinniartoqarpoq. Taamaalilluta ukliut 30-t matuma siorna angunngitsuukkavut massakkut angulerpavut, Aqqqaluk Lynge oqarpoq nangillunilu:
- Angusani pingaarnerpaavoq, danskit naalagaaffiata iluani innuttaasoqarsinnaalernera immikkut inuiaassusilinnik. Kalaallit danskillu angusaqaqatigiipput, tamarmik tulluusimaarutigisassaminnik. Inuiattut aatsaat akuerseqatigiikkaanni aatsaat innuttaaqatigiittoqarsinnaavoq. Angusaq assortuisut isumaqataasullu nalilerniagassaat, ICC-ip Nunatsinni siulittaasua Aqqaluk Lynge oqarpoq.
