ICC-mi ataatsimeersuarneq naavoq

NALILIINEQ: Inatsisartut siulittaasuata Josef Motzfeldtip aamma piniarnermut naalakkersuisup Ane Hansenip ataatsimeersuartunut oqalugiarnerminni eqqusseqqusiunnaarnissaq isornartorsiorpaat.

Ane Hansen naapertorlugu eqqusseqqusiunnaarneq "inunnik immikkoortitsineruvoq".

Taassuma Josef Motzfeldtillu ICC-mi ataatsimeersuarneq aqqutigalugu EU-mik isornartorsiuinerat, Kalaallit Nunaata pisortatigoortumik nunanut allanut pissuseqarnermini aqqutissarsiorneratut isigineqarsinnaavoq.

Killiffik tassaavoq, kattuffiit arlallit, taakkunani ICC-p kalaallit nunaanni immikkoortua ilaalluni, EU Europamiut eqqartuussivissuannut suliassanngortinnikuummassuk, aammali Norgep Canadallu EU Niuerneq pillugu Nunarsuaq tamakkerlugu Kattuffissuarmut, WTO-mut suliassanngortinnikuuaa.

Naalakkersuisut suliassanngortitsinerni taakkunani marlunni peqataanngillat.

Eqqusseqqusiunnaarnermi naggueqatigiit inuit pineqanngillaq, Danmark Nunarput sinerlugu iliuuseqarneratigut.

Eqqumiissagaluaqaarlu, Nunatta piumasani pereerlugu, EU eqqartuussivimmut tunniukkaluarpagu.

Nunarput naalagaaffeqatigiinnermi ilaagami nunanut allanut namminerisaminik politikkeqarsinnaangilaq. Nunarput FN-imi ilaasortaanngilaq. ICC-li FN-imut attaveqarpoq, nunat inoqqaavi pillugit ataavartumik ataatsimiittarfiani peqataagami.

Danmarkimit tusaaneqanngikkaanni, ICC-mi oqalussinnaneq iluassaqaaq.

ICC-mi ataatsimeersuartunik KNR-ikkut malinnaasut aamma malugiunnarsivaat, Nuummiit Nalunaarutissap oqaluuserineqarnera tukattumik ingerlaleraluarmat.

Beringsstrædemi kapisilinniarnerup nungusaatannginnissaa, Nuummiit nalunaarummi ilanngunneqassasoq, Alaskamiut allartitaasa ilaata Mike Hoffmannip kissaatigileriartaarpaa.

Siunnersuut taanna nunat aallartitaasa iluminni oqaluuserisimanngimmassut,

allartitat arlallit naammagittaalliorput. Siunnersuummi Mike Hoffmannip nunaqqataanilluunniit tusarneqarsimanngilaq.

Taava Alaskameersoq alla George Edwardsen Nalunaarutip oqaasertaanik allanngortitsinissamik periarfissaqarsorilerpoq. Taasuma oqaaseq ataaseq ilannguteqquaa, taamaalippalli Inuit Qalasersuaq tamaat oqartussaaffigilissagaluarpaat.

Nuummiit nalunaarut taasissutigineqarmat, aallartitani 66-ini George Edwardsen kisiartaalluni naammagittaalluni naaggaarpoq.

- Taamaallaat oqaaseq ilanngutsikkusutara ilanngunneqanngimmat taamaaliorpunga, Nalunaarutip sinnera tapersersorpara, George Edwardsen oqarpoq.