ICC: Inuinnaat saaffissaqartariaqarput

Immap naqqani sajuppillatsitsilluni misissuisarnerit piniagassanut sunniuteqapiluttarnerat pillugu Nunavup avannaani Inuit akerliunerat eqqartuussivimmit ilalerneqarnera nuanneqaaq, Kisianni nunatsinni pissutsit allaapput ICC-p præsidentia Aqqaluk Lynge oqarpoq.

- Aatsitassarsiorfippassuit suliffissuarpassuillu nunarsuaq tamakkerlugu atuuttut kasuttorfissaat ataasiinnaavoq, tassaalluni Aatsitassarsiornermut Pisortaqarpoq. Uagulli - inuinnaat - nunatsinnik pisuussutaanillu atuisussat saaffissagut arlaliupput, saaffissaq ataaseq amigaataavoq, ICC-p præsidentia erseqqissaavoq.

Nunavummi sajuppillatsitsilluni immap naqqanik misissuinernut akerliusut Kattuffiat suliniuteqarnermigut angusaqarpoq, siulittaasuata Okalik Eegeesiak'ip siornatigut arlaleriarluni oqaatigisareerpaa, inuit misissuinissanut akerliunerat pisortanit tusaanngitsuusaarneqartarsimasoq.

Maannalu kattuffeqarnikkut anguniagartik anguaat, nunatsinni kattuffinni taamaattunik peqanngilagut Aqqaluk Lynge oqarpoq.

Inuinnaat aamma akuutinnerulerumallugit matut kasuttorfissaat arlalippassuutikkunnaarlugit ataasiinnarmut saaffiginniffissaqalernissaat anguniarneqarpoq.

- ICC aamma atorneqarsinnaavoq, kisianni isumaqatigiiffissatsinnik pilersitsinissaq pisariaqalersimavoq, Aqqaluk Lynge naggasiivoq.