ICC-imi præsidenti: Meeqqanik kaanneraaneq kukkuluttorneruvoq

Taama isumaqarpoq, Inuit Issittormiut Siunnersuisoqatigiiffiat, ICC. UNICEF Inuit Issittormiut Siunnersuisoqatigiiffiata naqqiuteqaqquaa.

- Meeqqat pisinnaatitaaffiinik Kalaallit Nunaat unioqqutitsinerarlugu UNICEF pisussaanngilaq, taamaammat naqqiuteqaqquniarparput, Inuit Issittormiut Siunnersuisoqatigiiffianni præsidenti, Aqqaluk Lynge, Radioaviisimut ullumi oqarpoq.

Aqqaluk Lynge isumaqarpoq, UNICEF eqqunngitsuliortoq, meeqqallu kaattut qanoq amerlatiginerinik oqariartuutaa ingasattajaarujussuartoq.

- Kalaallit Nunaanni meeqqanik kaattoqartarnera miserratiginianngilara. UNICEF-illi ingasattajaarnera akerlilerusuppara. Suliniaqatigiiffik eqqunngitsunik paasissutissiivoq, tusagassiuutitigullu illuinnaasiorluni imminut nukittorsarniarsarivoq, Aqqaluk Lynge oqarpoq, ilaatigullu tikkuarlugu meeqqat piitsut pillugit europamiut oqariartuutigisartagaat Kalaallit Nunaanni atorneqarsinnaanngitsoq.

Inuit Issittormiut Siunnersuisoqatigiiffianni præsidenti isumaqanngilluinnarpoq, piitsuussuseq Kalaallit Nunaanni ajornartorsiutaasoq – tikkuarpaali akunnattumik aningaasarsiallit ajornartorsiutaanerat.

- Suliffissaqanngitsut ikiorserneqarnissaminnut periarfissaqarput. Ilaqutariilli akissaatikitsut, soorlu immaqa angajoqqaat SIK malillugu aningaasarsiallit, aningaasatigut ikiorserneqarsinnaanngillat, aamma meeqqerivinnut akiliinikinnerusinnaanatik. Ajornartorsiununa tassaniittoq, tamannalu aaqqiiviginiartariaqarparput, Aqqaluk Lynge oqarpoq.