ICC: USA mittarfissuarnut aningaasaleeqataassappat ernumanartoqarpoq
USA-mi sakkutooqarfiata saniatigut illersornissamut tunngasunik annertusaaniarnertut paasineqarsinnaasoq, ICC-p Kalaallit Nunaanni siulittaasuata Hjalmar Dahlip oqaatigaa:
- Isumakuluutigisara tassaavoq USA-p mittarfinnut aningaasaliisinnaanermut tunngatillugu nalunaarutaani sakkutooqarnermut illersornissamullu ersarivissumik tunngassuteqartunik imaqarmat, ICC Kalaallit Nunaanni siulittaasoq Hjalmar Dahl taama oqarpoq.
USA-p nunatsinni mittarfiit pillugit aningaasaliisinnaanermut soqutiginninnera, USA-p Pituffimmi sakkutooqarfiata saniatigut nunatsinni illersornissamut tunngasunik annertusaaniarnertut paasineqarsinnaanera, Hjalmar Dahlip ICC sinnerlugu ernummatigaa:
- Ernummatigisamma ilaat tassaavoq aamma soorlu mittarfiit nutaassat taakkua imaluunniit ineriartortinniarneqartut sakkutooqarnermut illersornissamullu tunngasutigut ilaqassappata taava USA-p soorlu akeqqamisut isigisaanniit isiginiarneqarnera aammalu arlaatigut iliuuseqarfigisinnaaneraat ammarneqassammat, Hjalmar Dahl, ICC-meersoq, taama oqarpoq.
Siunissami qaninnermi ungasinnerusumilu suliniutigineqartussat assigiinngitsut, ICC-p Alaskami Utqiagvimmi ataatsimeersuaqqammernerani aalajangerneqarput, taakkununnga ilaasut tassaavoq:
”Issittoq Nunarsuup Immikkoortuattut Eqqisseqatigiiffittut” suliniut.
Issittup eqqissinermuinnaq siunissami atorneqarnissaa ICC-p ataatsimeersuarnerani naggueqatigiit Inuit akornanni tamanit tapersersorneqarluni isumaqatigiissutigineqarluni suliniutigineqarnialerpoq.