ICC FN-imi
Oqallinnerit ilaatigut ataatsimiittut ataatsimoorlutik ingerlappaat ilaatigullu nunat aalajangersimasut ataatsimoortillugit oqaluuserisalluunniit apeqqutaatillugit eqimattakkuutaarlutik pisarlutik.
Taamaalilluni eqimattani issittormiuni kalaallit aamma Samit Norgemeersut, Sverigemeersut aamma Finlandimeersut pingaarutilimmik peqataapput. Eqimattat ataatsimiinnerini oqallisigineqartut ataatsimoorluni ataatsimiinnernut ingerlateqqinneqartarput.
Hjalmar Dahlip ICC Kalaallit Nunaanneersup taamaalilluni Nunat Inoqqaavisa Ataatsimeersuarneranni Naalagaaffiit Peqatigiit qullersaqarfianni siorna septembarimi pisumi innersuussutigineqartut pingaaruteqarnerat saqqummiuppaa.
Tassani innersuussutigineqartut ilarpassuini pineqarlutik Naalagaaffiit Peqatigiit Nunat Inoqqaavi pillugit inuttut pisinnaatitaafinnut aalajangersagaasa sapinngisaq naapertorlugu nunarsuarmi tamarmi atuutilersinneqarnissaat, aamma nunarsuarmi naalagaaffiit nunat inooqqaavinik sammisani taakkununnga tunngasuni suleqateqarlutillu oqaloqateqartarnissaat pineqarlutik.
Juliane Henningsenip Inatsisartut sinnerlugit peqataasup, ataatsimoorluni ataatsimiinermi arnat ingammik nunaqarfinni illoqarfinnilu minnerusuni najugallit najukkaminni nunalu tamakkerlugu naalakkersuinikkut sulinermi peqataatinneqarnerusariaqarnerat saqqummiuppaa. Taassuma Nunatsinni kommunini arlalinni nunaqarfinni aqutsisuni kommunalbestyrelsinilu ilaasortat arnat ikittuinnanerat assersuutigalugu taavaa.
Megan Davis, New Zealandimi maorineersoq, Nunat Inoqqaavisa Isummersoqatigiiffianni ukiuni tulliuttuni siulittaasussatut qinigaavoq. Taassuma Alaskameersoq Dalee Sambo taarserpaa.
