ICC Bruxellesimi allaffeqarfittaassaaq

- Bruxellesimi aalajangersimasumik sinniisuutitaqarnissaq pisariaqartutut isigaarput, paasissutissanimmi eqqortunik tunineqartarnissaq pisariaqarpoq, uumasunimmi illersuiniaqatigiiffiit amerlanerit paasissutissanik eqqunngitsunik maannamut tunniussisarsimapput, Inuit Issittormiut Siunnersuisoqatigiifianni præsidenti, Aqqaluk Lynge, Radioaviisimut oqarpoq.

Inuit Issittormiut Siunnersuisoqatigiiffiat immikkut ittumik Nuummi ataatsimeeqqammerpoq, allaffeqarfittaarnissamillu pilersaarut ataatsimiinnerup kinguninngua takkuppoq.

- Issittoq pillugu EU-p politikkiata ilusilersorneqarnissaanut atatillugu Inuit Issittormiut Siunnersuisoqatigiiffia EU-Kommissionimit maanna ataatsimiigiaqquneqarpoq. Naatsorsuutigaarpullu Inuit Issittormiut Siunnersuisoqatigiiffiata EU-Kommissionillu akornanni malittarisalittut aaqqissuussamik suleqatigiinnerulernissamut tamanna aallarniutaassasoq. Nutaajuvoq, aamma suleqatigiinnerulernissaq eqqarsaatigalugu, Aqqaluk Lynge qalleqqissaavoq. Ilulissani siorna ataatsimeersuartoqarnerani EU-mi politikerit Aqqaluk Lyngep isornartorsiorpai, issittumi innuttaasut qulaatiinnarlugit iliuuseqartarnerarlugit.

Inuit Issittormiut Siunnersuisoqatigiiffiata pingaartitaasa ilagaat puisit amiinik nunanut EU-mut ilaasortaasunut eqqussueqqusinnginnissamut siunnersuut.

- Tamannarpiaq naggatissaa tikillugu malersorniarparput. Pisuussutimmi uumassusillit atorneqarnissaannut pisinnaatitaaffitta atorluarneqarnissaannut tamanna aallarnisaataavoq. Ajornartorsiut annertoorujussuuvoq, oqartarnerattuummi, ilulissap nuua taamaallaat manna tikillugu takusimavarput, Aqqaluk Lynge oqarpoq.

Puisit pillugit EU-p politikkiata eqqartornerata saniatigut, Inuit Issittormiut Siunnersuisoqatigiiffiata immikkut ittumik ataatsimeersuarnermini meeqqat atugarliortut aamma eqqartorpaat.