URANI ICC: Aatsitassat sorliit EU naapertorlugu "dual-use"-iuppat?

Nunatsinni uranisiortoqalissappat nakkutilliisoqarnissaanut atatillugu malittarisassaliortoqarnissaa pillugu inatsisissatut siunnersuutit marluk Folketingimi ukiaru oqallisigineqartussaanerat pissutaalluni taama apeqquteqartoqarpoq.

Aatsitassat sorliit sakkussiornermut eqqissisimasumillu siunertaqartumik atorneqassanersut EU-p isiginerai ICC-p tusarniaanermut atatillugu akissummi paaserusuppaa, tassa aatsitassat atorneqarneranni dual-use-imik taaneqartartut.

Inatsissatummi siunnersuummi tamanna ersarissarneqarsimanngitsoq ICC isumaqarpoq. Aatsitassat piiarneqalissappata avammullu tunisassiarineqalerlutik sumut atorniarneqarnerat aatsitassarsioqatigiinnut, atorfilittanut innuttaasunullu paasinarsinissaat siunertaavoq, suut immikkut nakkutigisassatut isigineqarnersut ersarissarneqarniarluni. ICC KNR-imut taama ilaatigut nassuiaavoq.

Aatsitassat sakkussiornermut eqqissisimasunulluunniit atorniarneqarnerannut tunngasumik Sulisitsisut Peqatigiiffiata GE-p tusarniaanermut akissummi ilaatigut allaaseraa. Inatsisissatulli siunnersuutit marluk pineqartut tapersersorlugit GE-p nalunaarutigaa, EU-llu allattorsimasuuteqarfia aallaavigalugu nakkutilliisoqarnissaa ujartorlugu.

Folketingip Kalaallit Nunaannut tunngasunut ataatsimiititaliaa uran pillugu tamanut ammasumik ullumi pingasunngornermi tusarniaassaaq.