Iben Mondrup nersornaatitut inuunermi sinnerani akissarsisassasoq

Nunarput pillugu atuakkiukkajuttoq, Iben Mondrup, eqqumiitsuliortutut suliani pillugit nersornaatitut inuunermi sinnerani akissarsisalertussanngorpoq.
Iben Mondrup eqqumiitsuliortut nersornaatitut inuunermi sinnerani akissarsitinneqartalertussanngortut ukioq manna 15-iusunut ilaavoq. Assi © : Janus Camara
Allattoq Rune Hvistendal Kristiansen
novembarip 29-at 2022 15:53
Nutserisoq Hanne Petersen

53-inik ukiulik Iben Mondrup nunatsinnut tunngasunik atuakkiaminik 2009-imili arlaleriarluni saqqummersitsinikuuvoq.

Taanna eqqumiitsuliortunut tapiissuteqartarfimmit, Statens Kunstfondeimit, nersornaatitut inuunermi sinnerani akissarsisalissaaq. Eqqumiitsuliortuni immikkuullarissunik pingaarutilinnillu suliaqarsimasut nersornaatitut inuunermi sinnerani akissarsitinneqartarput. 

Iben Mondrup Danmarkimi inunngorpoq, Qasigiannguanili, Qeqertarsuarmi Nuummilu peroriartorluni. Pingasunik ukioqarluni 18-ileereernissami tungaanut nunatsinniippoq.

Nunatsinni peroriartornera atuakkiaani ersertartoq

Taassuma nunatsinni peroriartornera atuakkiaani ingammik ersertarpoq. 

Assersuutigalugu atuakkiaata ilaat 2014-imi saqqummertoq, Godhavn, Qeqertartuarmi danskit ilaqutariinnut tunngavoq. Danskit ilaqutariit taakkua meerartaasa, Bjørkip, Knutip Hildellu nunatsinni peroriartornertik tamarmik immikkut qanoq sunnerneqaatigisimaneraat atuakkiamini tassani oqaluttuaraa.

Aamma kalaallit danskillu silarsuamikkut aporaaffeqartarnerat, atuakkiamik ilaanni, Tabita-mi, 2020-mi saqqummertumi Vittu-milu 2022-mi saqqummertumi oqaluttuarai. Atuakkiaani taakkunannga siulleq danskinut nuliariinnut Upernavimmut nuunnerannut kiffamillu qitornaannik marlunnik, Tabitamik Vittumillu, kingorna meeravissiartaarnerannut tunngavoq.

AAMMA ATUARUK Margretemut tapersersuisut: Meeravissiartaat pillugit paasissutissarsiortut ikiorneqartalerlik

Kalaallimmi meerartaasa ilaat taamanikkut Danmarkiliaanneqarlutik meeravissianngortitaasarsimanerat nalinginnaasuuvoq. Tamannalu paasigamiuk quarsaarutigisimagini, Iben Mondrup KNR-imut 2021-imi januaarimi oqarpoq:

- Qulaajarnerini mamiatsappunga, inoqatinummi taamani isiginneriaaseq allaaneroqisoq tassa danskiuneq kalaaliunermit pitsaanerusoqineqaqisoq ersermat, Iben Mondrup taamanikkut oqarpoq.

Eqqumiitsuliortut nersornaatitut inuunermi sinnerani akissarsitinneqartalertussanngortut ukioq manna 15-iupput. Taakku Statens Kunstfondenimit nersornaatitut inuunermi sinnerani ukiumut 18.000 koruunit 171.000 koruunillu akornanni akissarsisassapput. Ukiumut aningaasarsiaat aningaasarsiarissangatitaalluunniit aallaavigalugit nersornaatitut inuunermi sinnerani akissarsiassaat annertussusilerneqartarput.

Aamma atuaruk