IA: Sinerissamut qanittumi aalisarneq piaartumik oqallisigineqarli
Sinerissamut qanittumi aalisarneq ulluni kingullerni oqallisaareersorlu piaartumik ataatsimiigiaqqusisoqarnissaa piumasarineqalerpoq. Aalisartut Piniartullu Kattuffiannit KNAPK-mit oqallinneq aallartinneqarpoq, tassa oqaatigineqarmat sinerissamut qanittumi aalisartunut raajartassiissutit nungungajalersut, tamannalu aalisartunut kinguneqarnerlussinnaasoq.
IA-mit ingammik maluginiarneqarpoq, aalisartut akiliisinnaajunnaarnissamik navianartorsiortinneqartut, taamaattumillu piaartumik ataatsimiittoqarnissaa piumasaralugu.
- Inuit Ataqatigiit isumaqarput iliuuseqarnissaq aqagumut utaqqisinneqassagaluarpat sinerissap qanittuani aalisartut aappaagu ikileriarujussuarnerannik kinguneqarataannaasoq. Taamaammat pinasuartumik iliuuseqarnissaq siunertaralugu piaartumik oqaloqatigiittoqartariaqarpoq, Ane Hansen, Inatsisartut Aalisarnermut, Piniarnermut, Nunalerinermullu ataatsimiititaliaani ilaasortaq oqarpoq.
Tamatumunnga peqatigitillugu Ane Hansenip politikerit naalakkersuisullu alloriarnissamut piumassuseqarnersut aperalugit tinnersarpai.
- Massakkut alloriarnissamut piumassuseq politikerinit naalakkersuisunillu tusarnissaa kisimi amigaataalerpoq, Ane Hansen erseqqissaavoq.