IA Qaasuitsup Kommuniani: Ole Dorph borgmesteritut tunuartariaqarpoq

Nunaqarfimmi Ilimanami illorsuit ilaat aaqqissuullugit takornariaqarnermik siuarsaanissamut, aningaasaateqarfiup Realdaniap aningaasaleerusussuseqarnera pillugu, Ilimanami innuttaasunut paasisitsiniaanermi, borgmester Ole Dorph takkulluni inuittartut peqataasutut imminut oqaatiginera, Inuit Ataqatigiit sinnerlugit kommunalbestyrelsemut ilaasortap, Bent B. Kristiansenip akuerisinnaannginnerarpaa.

- Borgmesteri inuiaqatigiit ataatsimiisinneqarneranni oqartassappat ullumikkut borgmesteriunani, taava apeqquserneqartariaqarpoq borgmesterisut pisussaaffik piffassamik tamakkiisumik akisussaaffeqartoq, Ole Dorphip nammassinnaaneraa, Bent B. Kristiansen oqarpoq nangillunilu oqaatigalugu, oqaatsinik nikerartunik innuttaasunut Ole Dorph nalunaartuassappat, taava Qaasuitsup Kommuniani borgmesteri allamik taarserneqartariaqartoq.

Qaasuitsup Kommuniani kommunalbestyrelse juunip aqqaneq aappaanni ileqquusumik ataatsimiinnermi, kommunip pilersaarutaanut tapiliussaq, tassa Ilimanamut tunngasoq eqqartorneqalermat, Ole Dorph ilisimatitsivoq, oqaluuserisamut soqutigisaqarnini pillugu ataatsimiinnermi peqataasinnaanani. Tamanna pillugu Bent B. Kristiansen ima oqarpoq.

- Kommunalbestyrelsip ataatsimiilernerani ersarissanngilaa soqutigisani suunersoq. Kisiannili tassa Ilimanami innuttaasunut ataatsimiisitsinermi aatsaat paasinarsivoq soqutigisai suunersut, tamannalumi assigiinngitsutigut malussarfigalutigu.

Bent B. Kristiansen taama oqarpoq nangillunilu oqaatigalugu, Qaasuitsup Kommunianut aningaasaleerusussuseqarneq Ole Dorphip assigiinngitsunik innuttaasunut oqariartortaqattaarnerata innarleraa.

- Borgemsterip aningaasaqarnermut ataatsimiisitaliami siulittaasutut, Ilimanami pilersaarutit akuerai, misissugassartarqarlutilli. Pilersaarutit taakku Inuit Ataqatigiinniit taperserpavut, kisianni tamassuma kingorna Ole Dorphip allanngorartunik isummeqattaarnera malugaarput. Taama pissusilersornerata kommunitta siunissami aningaasaliiffigineqarnissaata soqutiginassusaa innarlerpaa, Bent B. Kristiansen oqarpoq.

Qaasuitsup Kommuniani takornariaqarnermut siuarsaanermi aningaasaqarluarnissaq pisariaqartinneqartoq, Bent B. Kristiansenip oqaatigaa.

- Kommunitsinni takornariaqarnerup ineriartortinneqarnissaa kommunip tamakkiisumik aningaasaliiffigissallugu maanna nukissaqarfiginngilaa, taamaattumik kommunitta Nunattalumi tamarmi pisariaqartippaa, aningaasaleerusuttunut maanna qammaassalluni piffissanngortoq. Taamaattumik oqaatigeqqittariaqarpara aningaasaleerusussuseqarneq innarlerneqarmat.

Qaasuitsup Kommuniani kommunalbestyrelsemit Inuit Ataqatigiit sinnerlugit ilaasortaq, Bent B. Kristiansen taama oqarpoq. Taassuma isornartorsiutai pillugit borgmester Ole Dorph oqaaseqartinniarlugu sianerfigisaraluarparput iluatsinnaguli.