IA : Politikerit kukkussutaat utoqqarnut tutsinneqartussanngorpoq
Naalakkersuisunut apeqquteqaammini Olga Poulsen Berthelsenip paaserusuppaa, Nuup Kommunia utoqqalinersiutilinnut kukkusumik tapiissuteqartitsisarsimanermini, maanna utoqqarnut tuttussanngortinneqartuni, Nuup Kommunia inatsisitigut tunngavissaqarnersoq.
- Kukkusumik imaluunniit eqeersimaarsimannginnerup kingunerisaanik, utoqqaat atukkamikkut ajornerusumik inissisimalernissaat pissusissamisuunngilluinnarpoq. Allaffissornikkut kukkuneq utoqqarnut tutsinneqarsinnaanngilaq, Olga Poulsen Berthelsen apeqquteqaammini ilaatigut taama tunngavilersuivoq.
Olga Poulsen Berthelsenip aamma paaserusuppaa, Nuup Kommuniata kukkusumik tapiissuteqartitsisarsimaneranut kikkut nakkutilliisussaatitaanersut.
- Siullermik isumaqarpunga ukiuni taakkunani, Nuup Kommuniani politikimik suliaqarsimasugut, taamatut pisoqarneranut aamma akisussaaqataasugut, Olga Poulsen Berthelsen allappoq.
Taamaattorli aamma isumaqarluni politikimik suliaqartunut siunnersuineq amigartarsimasoq. Tassami qinikkat inatsisinut ilisimasaat amerlasuutigut killeqartarmata.
Olga Poulsen Berthelsenip apeqqutini naggaserlugit isumaginninnermut inatsisit naapertorlugit Naalakkersuisut Kommunini allanilu isumaginninnermut suliaqarfiusuni nakkutilliisussaatitaanerat erseqqissarpaa.
