IA-p siunnersuutaata tapersersorneqarnissaa qularnartoq

Nunatsinni inatsiseqarneq malunnaatilimmik pitsanngorsarneqartariaqarpoq. Inuit Ataqatigiit taama isumaqarput, Folketingimilu ullut ataatsimiiffiusut kingulliup tulliani aalajangiiffigisassatut siunnersuummik saqqummiussinermikkut danskit naalakkersuisui iliuuseqarnissaat qulakkeerniarsaraat. Socialdemokraatilli tigiartitsillutik taaseqataaniarput.
Assi © : IA Folketingimi
maajip 31-at 2017 07:03
Nutserisoq Simon Uldum -

Folketingimut ilaasortaq Inuit Ataqatigiinneersoq Aaja Chemnitz Larsen, danskit naalakkersuisuisa Nunatsinni inatsiseqarnerup nukittorsaavigineqarnissaanut peqquneqarnissaannik aalajangiiffigisassatut siunnersuuteqarpoq.

Immikkoortoq pineqartoq, Folketingimi ullut ataatsimiiffiusut kingulliup tulliani, sisamanngornermi, oqaluuserineqassaaq. Inuit Ataqatigiilli siunnersuutaat amerlanerussuteqartunit taperserneqassanersoq nalunarpoq.

Socialdemokraatit Dansk Folkepartiillu Nunatsinni inatsiseqarnerup pitsanngorsaavigineqarnissaanik kissaateqarlutik oqaatigereersimagaluarlugu,  Socialdemokratit siunnersuut itigartitsissutiginiarlugu aalajangersimapput.

Siunnersuutip ataatsikkoortumik pitsanngorsaatissanut piumasaqaatinik annertuallaartunik imaqarnera tamatumunnga pissutaatinneqarpoq.

- Aalajangiiffigisassatut siunnersuut itigartitsissutigalugu taaseqataassaagut, Inatsisinilli atuutitsinermut ministereqarfik Kalaallit Nunaannullu tunngasunut ataatsimiititaliaq suleqatigissavagut, Socialdemokraatit Kalaallit Nunaannut tunngasunut oqaaseqartartuat, Karin Gaardsted, KNR-imut taama oqarpoq.

Aaja Chemnitz Larsenip aalajangiiffigisassatut siunnersuutaa pitsanngorsaatissatut siunnersuutinik tigussaasunik 30-nik imaqarpoq.

Nunatsinni inatsiseqarneq pillugu apriilip qaammataani tusarniaasoqarmat, danskit inatsisinik atuutitsinermut ministeriata Søren Pape Poulsenip oqaatigaa siunnersuutit ammaffigalugit, 'maannakkorpiarli' tamatumunnga aningaasassaqanngikkallartoq.

Inatsisinik atuutitsinermut naalakkersuisup Sara Olsvigip pitsanngorsaasoqarnissaanik pisariaqartitsineq pillugu Pape qanittukkut oqaloqatigaa. Pitsanngorsaatissanilli tigussaasunik maannamut suli isumaqatigiissuteqartoqanngilaq.