IA-p Lars-Emil Johansen isornartorsiorpaa

Lars-Emil Johansenip naalakkersuisuni ilaasortanngortup, Folketingimi, taamatullu Namminersorneq Pillugu isumalioqatigiissitarsuarmi, ataatsikkut atuuffeqalernera, Inatsisartuni illuatungiliuttut, Inuit Ataqatigiit, isornartoqartippaat.

- Naalakkersuisut siulittaasuata inuit tamat oqartussaaqataanerannik paasinneriaasia sarfaq malillugu saqeqattaarpoq. Demokraatii inuinnaat naalakkersueqataaneranni tunngaviit pingaarnerpaartaraat. Demokratii tunngavigalugu, demokratiimullu ataqqinnippaluttumik, nunarput naalakkersuinikkut aqunneqartariaqarpoq.

Lars-Emil Johansenip politikkikkut inissisimalernera tikkuarlugu Inuit Ataqatigiit taama uparuaapput.

- Inuk ataaseq annertoqisumik pissaaneqartitaalluni naalakkersuinikkut sulissasoq siullermik akuersaarpaa. Pissaanermik eqiterineq, Namminersornerulluni Oqartussaanermi siornagut nunatsinni takusimanngisaannagarput, Inatsisartuni ilaasortaq Inuit Ataqatigiinneersoq, Asii Chemnitz Narup taama allappoq, piumasaralugulu, Naalakkersuisut siulittaasuata maanna demokratiimik paasinnittaatsini qanorlu siunnerfeqarnini pillugu innuttaasunut sukumiisumik nassuiaateqartariaqartoq.