IA-p inussuttaasa siulittaasussap folketingimi ilaasortaannginnissaa piumasaraat
IA-p Inuusuttaasa sinniisuata Juliane Henningsenip erseqqissarpaa partiimi siulittaasuuneq Folketingimilu ilaasortaaneq ataatsikkoortinneqarsinnaanngitsut.
-Siulittaasorput siuttoralugu piffissaq tulliuttoq suliassaraarput inuiaqatigiinnut paasitissallugu suna Inuit Ataqatigiit immikkoorutigineraat. Taamaattumik partiip siulittaasuata sapinngisamik nunatsinniittuunissaa pisariaqartipparput, nalunngilarpummi Folketingimut aamma piukkunnarluartunik sinniisussaateqarluta.
Juliane Henningsen-ip ualimut radioavis-mut oqarpoq, siulersuisuini qinersinermi, IA-p allatsitut inissisimaffia IA-p inuusuttaanit sassarfiginiarlugu siunniullugu, aammalu IA-p anguniaagaa inuusuttunut tulluartunngorsarneqartariaqartoq, namminnerlu inuusuttoqatiminnut tuniniaanissartik suliassami annersaasa ilagissagaat.
Kuupik Kleistip Folketingimiiginnarnissi aalajanngiusimavaa.
–Qinersisartunik tunutsinerussaaq qinigaaffik naanngitsoq tunuassagaluaruma, qinersisartullu taama pakatsisikkusunngilakka, Kuupik Kleist Sermitsiaq.gl-imut oqarpoq.
Inuit Ataqatigiit aalajangiussaqarput siulittaasoq ilanngulluni Folketingimut qineqqusaarsinnaasoq, taamaattumillu aalajangerneq tamanna allanngortinneqartariaqassasoq Kuupik Kleist isumaqarpoq.
Taama nutaamik aalajangertoqarnissaa pillugu IA-p ataatsimeersuarnerani oqaluuserisassanngortitsisoqarsimanngilaq, taamaattumillu oqallinneq siulittaasussamik qinersinermut atatillugu pisariaqassaaq, aviisip sermitsiap nittartagaa allappoq.