IA-p inatsisartuni ilaasortaatitai kujataani angalaarput
Inuit Ataqatigiit Inatsisartuni ilaasortaatitai paasisassarsiorniarlutik Kujataani angalapput. Kujataani innuttaasunik ataatsimiititseqattaartoqassaaq.
Allattoq Mads Lynge
Nanortalimmi ippassaq ataatsimiittoqarpoq, Qaqortumilu aqagu ataatsimiititsisoqassalluni. Narsami pingasunngorpat ataatsimiititsisoqariarluni Narsarsuarmi sisamanngorpat ataatsimiittoqassaaq.
Sikorsuaqarnera pissutaalluni nunaqarfiit tikinneqassanngillat.
Innuttaasunik ataatsimiititsisaqattaarnerit qulequtarissavaat Inuussutissarsiornikkut, inooqatigiinnikkut nunallu immikkoortuini ineriartortitsinissaq pillugu sammivissanik katersinissaq.
Paasissutissat katersorneqartut Inatsisartuni naalakkersuinikkullu politikkikkut sulinermi atorneqarnissaat siunertaavoq.