IA-p folketingimut qineqqusaartussani ilisaritikkai
Inuit Ataqatigiit sinnerlugu folketingimut sassartussat ullumi siulittaasuannit ilisaritinneqarput, Inuit ataqatigiit folketingimi issiaannarnissaat taassuma neriuutigaa.
Qinigassanngortittullu tassaapput:
Anders Jensen, Aqqalukkuluk Fontain, Sofia Geisler aamma Aaja Chemnitz Larsen.
Maanna Inuit ataqatigiit sinnerlugit folketingimi ilaasortaq Aaja C. Larsen ukuni sisamani suli issiaqqinnissaminut piareernerarpoq.
- Suliniutigisimasakka angusimasakkalu suli sorsussutigerusuppakka, assersuutigalugu inatsisilerinermut tunngassuteqartut. Nunaqarfinnimi kommunefogedinut atugassarititat nammanngilluinnarput, taamaammat ukiuni sisamani tamakku suliareqqinnissaanut piareersimavunga.
Nunatta akisussaaffiit 30-t sinnillit angerlaatissagunigit aningaasaqarnikkut patajaatsumik folketingemi issiasoqartariaqartoq Sofia Geisler isumaqarpoq:
- Akisussaaffiit nunatsinnut angerlaassassat ima amerlatigaat 570 mio. koruuninik naleqarput, taakkulu akisussaaffiit angerlaassoornissaanut akisussaassusilimmik issiasoqarnissaa pinngitsoorneqarsinnaanngilaq, taamaammat qinigassanngortippunga, taanna oqarpoq.
Folketingimut qinersinissaq kingusinnerpaamik juunip 17-ani pissaaq.