IA Nuuk aalajangiinermut assuarinnippoq
Aningaasaqarnermut Ataatsimiititaliaq Nuummi Inuit Ataqatigiit kajumissaarpaat suliaq qaqinneqaqqullugu, itigartitsinertillu allanngorteqqullugu.
Naalakkersuisut 3,4 millionit koruuninik qinnuteqaraluarput, taakku aningaasaliissutinit allanit nuunneqarsinnaagaluarlutik. Aningaasaqarnermulli Ataatsimiititaliaq tassa naaggaarpoq. Ataatsimiititaliap ilaatigut kissaatigaa Assartuineq pillugu Isumalioqatigiissitap isumaliutissiissutaa Inatsisartut ukiaru ataatsimiilerpata aatsaat oqaluuserineqassasoq.
- Imaassinnaavormi Assartuineq pillugu Isumalioqatigiissitap pingaarnersiuineranit Inatsisartut allaanerusumik pingaarnersiuisut, itigartitsissummi tunngavilersuutigineqarpoq.
Aningaasaqarnermulli Ataatsimiititaliaq Nuummi Inuit Ataqatigiit isumaqatiginngilaat, Ataatsimiititaliami Olga P. Berthelsen siulittaasuuvoq. Nuummi Umiarsualiviup mikivallaarnera, Nunattalu ineriartorneranut pisut annertusiartornerat ilutigalugit malinnaatinneqannginnera, partiip erseqqissaatigaa, suliniullu siunissamut naleqqukkaluarnerarlugu.
- Nutaamik umiarsualiviliornissamut aningaasaleeqataarusullutik nalunaarsimasut misissuinissani Nunatta Karsiatulli atsigisumik aningaasaleeqataanissaminnut piareersimarpalupput. Taamaattumik Aningaasqarnermut Ataatsimiititaliap aalajangernera eqqumiippoq. Periarfissatsialammut sanilliuttugit aningaasarpassuit eqqartorneqanngillat, Nuummi Inuit Ataqatigiit aamma oqarput.
