IA: NunaOil-imi pisut ernumanartortaqarput
Apeqqutit ukua ilaatigut akeqquaat, Naalakkersuisuugallartut ingerlatseqatigiiffimmut piumasaqaatitigut tunngaviatigut allannguisunik Nunaoil A/S-ip sipaarniuteqarnissaanik piumasaqarsimanerat ilumoornersoq? Aammalu tamanna qinersinissamik nalunaaruteqarnerup aatsaat pereerneratigut nalunaarutigineqarsimanersoq? Naaja Nathanielsen Inuit Ataqatigiillu siulittaasuat Sara Olsvig ataatsimoorlutik KNR-imut allapput.
Naalakkersuisut Siulittaasoqarfianit oqaaseqaat NunaOil-imut nasiunneqarsimasoq takorusuppaat, tassani siulersuisuusimasut naapertorlugit sipaarniutissanik aalajangersimasunik peqqusinikkut siulersuisut piginnaatitaanerannut akuliuttoqarsimasoq takuneqarsinnaammat.
Naggasiullugulu Nunaoil A/S-ip maanna siulersuisoorussimatillugu illersorneqarsinnaasumik aqunneqarnissaanut Naalakkersuisut qanoq qulakkeerinninniarnersut politikerit IA-meersut taakku apeqqutigaat.
- Erseqqissaatigissavarput qineqqusaartoqartillugu Naalakkersuisut siulersuisunik nutaanik toqqaasinnaatitaanngimmata. Taamaattumik Naalakkersuisut malittarisassat naapertorlugit aaqqiissutissamik allamik nassataqarlutik ataatsimiinnermut aggeqquneqarput, Naaja Nathanielsenip Sara Olsvigillu taama naggasiipput.